Mjeku Pëllumb Pipero, komentoi efektet e vaksinës, pasi ishte ndër të parët që mori dozën e Pfizer në vendin tonë.
I ftuar në Çim Peka Live, ai tha se nuk kishte asnjë shqetësim dhe se ndihej i qetë.
“Ndjehem i qetë, kam një dhimbje fare të lehtë në vendin e vaksinimit. Kaq për momentin. Nuk kam asnjë shqetësim tjetër. Efektet anësore zakonisht shfaqen gjatë orës së parë pasi bëhet vaksina, gjithsesi nuk kam ndonjë shqetësim”.
“Kisha dëshirë ta bëja vaksinën në studion tuaj, por kushtet e aplikimit nuk e lejojnë një komoditet të tillë. Ju kërkoj ndjesë por nuk munda ta realizoj. Kjo është vaksina e Pfizer dhe vaksinimi i plotë konsiderohet pas dozës së dytë,” tha Pipero
I pyetur nëse është i bindur se ka marrë vaksinën e Pfizer dhe jo vaksinën e gripit, Pipero u shpreh i bindur se ka marrë vaksinën e duhur.
“Unë kam thënë se do jem i pari që do vaksinohem. Jam besimplotë te vaksina si mjet kryesor për parandalimin e sëmundjes. Unë i pashë me sytë e mi, i lexova me sytë e mi, i preka me duart e mia. Jam i sigurt 100 përqind që kam bërë vaksinën e Pfizer”, tha Pipero.
