Deputeti Petro Koçi, ka reaguar sërish pas deklaratave të tij publike se krimi ka shtrirë duart në financat publike në zonën e Fierit.
Kujtojmë këtu se pas daljes nga Prokuroria e Posaçme, ai tha se është i bindur se në Fier, ku ai u zgjodh rishtazi deputet, përfaqësues të krimit të organizuar ndikojnë në financat publike përmes lidhjeve të drejtpërdrejta apo duke kërcënuar zyrtarë të nivele të ndryshme.
Petro Koçi u shpreh se kriminelët fusin duart te tenderat në Fier, madje sipas tij, edhe kërcënojnë autoritetet lokale atje. Deputeti i zgjedhur i Partisë Socialiste bëri edhe akuzën e fortë se bota e krimit në Fier është e lidhur me politikën, sidomos me marrëdhënie me LSI, të cilën kanë ndikuar edhe në rezultatin e zgjedhjeve të fundit.
Por ai nuk e ka lënë me kaq, pasi ka përcjellë një tjetër reagim. Me anë të një postimi në rrjetin social Facebook, Koçi shkruan se kushdo që ka shkelur ligjin, duhet të përgjigjet para drejtësisë.
Statusi
Pas disa interpretimeve lidhur me qendrimet e mia politike kunder fenomeneve krimimale theksoj:
Kushdo qe ka shkelur ligjin te pergjigjet para drejtesise. Pavaresisht se çfare emri ka dhe cilin institucion drejton. Kam denoncuar impaktin e botes se krimit mbi financat publike pa paracaktuar apo perjashtuar ndonje institucion te perveçem ne Fier.
Çdo hamendje dhe perkthim shqip shqip i deklaratave te mia sipas bindjeve te interpretuesve te ndryshem nuk eshte pergjegjesi e imja.
Sponsorizimet apo lobimet e supozuara ne rastin e qendrimeve denoncuese qe kundermojne ere larje hesapesh jane te denueshme, te kompromentuara dhe te turpshme per kedo. Te tilla do ishin edhe per mua.
