Kryeministri Edi Rama, në një konferencën për media, nga Elbasani, pas mbledhjes se kabinetit qeveritar ka ironizuar gazetarët, por në të njëjtën kohë ka lajmëruar se brenda këtij viti do të finalizohet një aks i ri rrugor mes Elbasanit dhe Beratit.
I pyetur se një natë më parë në një emision televiziv kishte folur për arrestime të bujshme, dhe sot në kompleksin ku u mbajt mbledhja, kishte një karikaturë me peshq të mëdhenj që në të shfaqej kabineti qeveritar i tij, dhe se kjo pamje ishte një surprizë që peshqit e mëdhenj ishin ministrat e tij, Rama është përgjigjur: Unë nuk kam lajmëruar asnjë arrestim të bujshëm. Se unë nuk lajmëroj arrestime dhe nuk kam detyrë të arrestoj njerëz. Dhe kështu që kur të zgjoheni nga ëndrra ku më keni parë, duke lajmëruar arrestime të bujshme mund të bëhemi bashkë për një konferencë tjetër shtypi.
Nga ana tjetër, i pyetur lidhur me rekrutimet në administratë,dhe për ish-deputetin e PD-së Mëhill Fufi i cili sot është drejtor i transporteve në Laç, Rama tha:
Ju më keni parë mua duke ndjekur rekrutimet por do më keni parë në ndonjë ëndërr se unë nuk ndjek rekrutime. Rekrutimet i bëjnë institucionet dhe janë institucionet që ndjekin të gjitha procedurat. Kështu që duke qenë se është edhe kohë e freskët dhe bie shi, por është një shi shumë i pranueshëm, ju sugjeroj një ecje në shi për t’u zgjuar nga gjumi, dhe shpresoj që herën tjetër të jeni plotësisht të zgjuar, në konferencën e radhës.
Por, Rama ka dhënë dhe lajmin e mirë ku është shprehur se: “Kemi dy probleme të trashëguara, dy gropa që kemi bërë përpjekje për t’i mbushur por ende nuk e kemi bërë plotësisht. Kam parasysh rrugën Elbasan-Tiranë dhe rrugën tjetër Qukës-Qafë Plloc, projekte skandaloze. Jemi të vendosur të realizojmë rrugën brenda këtij viti të hapet. Po finalizohet një aks i ri rrugor i nisur në mandatin e parë mes Elbasanit e Beratit,”. TIRANA TODAY
