Qendra e Regjistrimit në Zubin Potok është djegur nga serbët. Këta të fundit, nga e hëna janë duke protestuar kundër reciprocitetit ndaj targave që ka vendosur Qeveria e Kosovës.
Zëdhënësi i Policisë për Mitrovicën e Veriut, Besim Hoti, ka konfirmuar për mediat në Kosovë se serbët kanë djegur Qendrën e Regjistrimit në Zubin Potok. Policia ndodhet në vendngjarje.
Më herët, kryeministri i Kosovës, Albin Kurti, tha se si Kosova ashtu edhe Serbia duhet t’i heqin targat e përkohshme të automjeteve, si pjesë e zgjidhjes së situatës së krijuar ditëve të fundit në veriun e Kosovës.
Vendimi i autoriteteve të Kosovës për të zbatuar masa reciprociteti ndaj automjeteve me targa të Serbisë, që hyjnë në Kosovë, ka nxitur protesta të banorëve serbë në veri të Kosovës dhe reagime të ashpra të Beogradit zyrtar.
Përfaqësues të Serbisë thonë se Kosova, me këtë veprim, ka shkelur dispozita të Marrëveshjes së Brukselit, të cilën dy vendet e kanë arritur me ndërmjetësimin e Bashkimit Evropian.
