Një incident është shënuar në fundin e ndeshjes mes Tërbunit dhe Egnatias, në qytetin e Pukës.
Sfida ka përfunduar me rezultatin 1-1, gjë që ka çuar në pakënaqësi tek fansat e skuadrës së Tërbunit. Sipas “Panorama Sport”, në momentin e vërshëllimit të gjyqtarit, për përfundimin e sfidës futbollistët dhe drejtuesit e skuadrës së Egnatias janë sulmuar nga një tifoz dhe një polic privat. Këta të fundit janë shoqëruar në komisariat.
Rrogozhinasit janë ngujuar në dhomat e zhveshjes, ndërsa është dashur ndërhyrja e policisë për të shmangur precipitimin e dhunës. Situata ka qenë aq e agravuar sa është kërkuar edhe ndërhyrja e Forca të Ndërhyrjes së Shpejtë, nga qyteti i Shkodrës.
Ndërkohë, raportohet se ka pasur edhe përplasje mes lojtarëve dhe drejtuesve, të cilët kanë shkuar drejt dhomave të zhveshjes së skuadrës mike.
