Banorë të Astirit dhe ish-deputetë të PD-së dhe LSI-së janë mbledhur para komisariatit numër 6, në Kombinat, ku kërkojnë lirimin e të shoqëruarve nga policia.
Më herët, në përplasjen e banorëve me policinë, kjo e fundit shoqëroi tre protestues dhe ish-deputetin Klevis Balliu, pasi bllokuan rrugën me qëllim moslejimin e kryeministrit Rama, i cili do të zhvillonte një takim në një biznes aty pranë.
“Burra dhe gra i përplasën në furgonët e policisë, ne nuk do ndalemi. Do i shkojmë deri në fund kësaj ngjarjeje”, tha per mediat ish-deputeti Paloka.
Protestuesit madje çanë kordonin e policisë dhe hynë në oborrin e komisariatit, me thirrjet “Lironi çunat” dhe “ky është gjenocid”.
Edhe Sekretari i Përgjithshëm i PD-së, Gazmend Bardhi, ka dhënë një deklaratë për mediat:
“Ky është një tjetër akti i paligjshëm i një qeveri të paligjshme, i një policie të paligjshme, që në vend që të luftojë krimin, lufton qytetarët që janë ngritur në mbrojtje të të drejtave të tyre, në mbrojtje të shtëpive të tyre dhe kundër një akti madhor korrupsioni.
Sot në burg nuk duhet të jenë banorët e Unazës së Madhe por duhet të jenë Damian Gjiknuri dhe e gjithë shpura e zyrtarëve të korruptuar që me një firmë tentuan t’u prishin shtëpitë këtyre banorëve dhe më pas të përfitojnë në mënyrë korruptive 20 milionë euro, Partia Demokratike e ka bërë të qartë qëndrimin e vetë.
Këtu nuk ka për t’u ndërtuar në kurriz të të drejtave dhe lirive themelore të këtyre qytetarëve. I bëj thirrje Policisë së Shtetit të kthehet në shinat e ligjit dhe të luftojë kriminelët dhe të mos luftojë dhe të dhunojë banorët.
Cilido prej punonjësve të policisë që sot ka dhunuar banorët e Unazës së Re, do të përballet dhe do të përgjigjet me ligjin. Edi Rama sigurisht që është në ditët e veta të fundit dhe është e pritshme që do të bëjë rezistencë duke përdorur Policinë e Shtetit kundër qytetarëve. Sot qytetarët janë të bashkuar dhe unë jam i sigurt që më 11 Maj do të marrë përgjigjen e merituar.
Pyetje: Përfaqësuesi i PD Klevis Balliu u mor nga policia, cili është qëndrimi juaj?
Gazment Bardhi: Është sigurisht një hakmarrje e pastër politike, një veprim i paligjshëm, e përsëris, sot në burg duhet të jenë ata që tentuan që nëpërmjet projektit të Unazës së Re të vjedhin me një projekt korruptiv të paktën 20 milionë euro. Banorët janë në të drejtën e tyre. Klevis Balliu ish-deputeti i PD-së ka qenë dhe do të jetë në mbështetje të këtyre banorëve sikundër është e do të jetë e gjithë Partia Demokratike.
