Ish-deputeti i partisë Demokratike, Flamur Noka, një ditë para protestës së organizuar nga opozita, u ka bërë thirrje qytetarëve që të mos bëhen pjesë e propagandës së mazhorancës, por duhet të bashkohen për ta rrëzuar këtë qeveri.
Teksa komentoi përgjimet e publikuara nga gazeta gjermane, përmes një postimi në “Facebook”, Noka theksoi se ka një përpjekje të vrullshme të pushtetit për të ngushtuar çështjen e vjedhjes së zgjedhjeve në Dibër.
“Kjo është gjëma që kanë sot në derë shqiptarët. Ky është kanceri që duhet shkulur, përpara së të na vrasë të gjithëve. Duhet bërë sot. Nesër do të jetë vonë”, nënvizoi Noka.
Postimi i plotë:
Ka një përpjekje të vrullshme të pushtetit për të ngushtuar çështjen e vjedhjes së zgjedhjeve në Dibër tek fjalori banal i pushtetarëve të majmur me paratë e drogës dhe të korrupsionit.
Ky është momenti që të mos bëhemi pjesë e propagandës së Bablokut të bandave të Dibrës e të gjithë Shqipërisë.
Përgjimet e publikuara nga Bild nxjerrin qartë si kristali:
Se Shteti është shndërruar në bandë.
Se bandat e drogës blejne votat dhe e komandojnë pushtetin.
Këto dy fakte të rënda dhe jo banaliteti i fjalorit të pushtetareve ka tronditur shqiptarët dhe miqtë e huaj.
Shqiptarët janë të tronditur e të neveritur.
Se ministra e deputetë përdorin shefin e policisë si komisar politik.
Se Shefi i policisë betohet e përbetohet për besnikëri politike ndaj Partisë.
Se Ministra e deputete i premtojnë karrierë shefit të policisë si shpërblim për masakrën elektorale.
I premtohet karriere shefit te policise te Dibres, që është edhe shef policie, edhe bos plantacionesh i hashashit, i dokumentuar ne listat e SHISH.
Kjo është gjëma që kanë sot në derë shqiptarët. Ky është kanceri që duhet shkulur, përpara së të na vrasë të gjithëve.
Duhet bërë sot. Nesër do të jetë vonë!
