Mbrëmjen e djeshme janë shkaktuar përleshje mes mbështetësve të qeverisë dhe opozitës në Podgoricë të Malit të Zi. Përleshjet ndodhën teksa mbështetësit e opozitës po festonin për fitoren. Lidhur me këtë situatë, menjëherë në lëvizje është vënë policia, e cila ka shpërndarë turmat.
Zgjedhjet parlamentare në Mal të Zi u mbajtën më 30 gusht, dhe sipas rezultateve ato u fituan nga koalicioni opozitar, i cili bashkoi mandatet duke larguar nga pushteti pas 30 vjetësh, Milo Gjukanovic, partia e të cilit mori 29 mandate. Opozita ka fituar me një mandat më shumë se partia në pushtet, ndërsa shqiptarët arritën që të siguronin 2 mandate në Kuvend.
Pas incidenteve, udhëheqësi i koalicionit opozitar “Për ardhmërinë e Malit të Zi”, Zdravko Krivokapiq, u bëri thirrje mbështetësve që të festojnë në shtëpi.
“Ne nuk qëndrojmë pas asnjë tubimi, nuk duam trazira, nuk duhet të irritojmë askënd. Le të qëndrojmë të qetë, le të qëndrojmë në shtëpi”, tha ai përmes një postimi në Facebook.
Partia Demokratike e Socialistëve (DPS), e cila aktualisht është në pushtet, tha se mbështetësit e opozitës, në disa qytete të Malit të Zi, kanë organizuar tubime, gjatë të cilave, “qytetarët janë provokuar në mënyrë agresive, me parulla nacionaliste”.
DPS tha se do të informojë Misionin Monitorues të OSBE-së dhe partnerët e tjerë ndërkombëtarë për incidentet.
