Presidenti i Republikës, Ilir Meta ka reaguar lidhur me përgjimet e publikuara të kryetarit të Kadastrës, Artan Lame.
Meta kërkon reagimin e organeve të Drejtësisë, duke shtuar se Policia duhet që të ndalojë përpjekjet për tjetërsimin e votës.
”Një audio-përgjim tronditës, që provon se për “Rilindjen” shqiptarët janë “mish për top”, ndërsa zyrat e shtetit, që paguhen me taksat tona, janë kthyer në strofulla të fuksave, banditëve, të korruptuarve, shkelësve të ligjit dhe “taksidarëve” të biznesit kriminal të votës.
Pres nga Drejtësia të zgjohet dhe të nisë menjëherë hetimet për këtë skandal të rëndë, që meriton ndëshkim. I bëj thirrje Policisë së Shtetit, të bëjë kujdes dhe të ndalë përpjekjet për manipulimin e provave të flagrancës të krimit zgjedhor. Mos e detyroni popullin të arrestojë të paudhët!’’, shkruan Meta në rrjetin social, Facebook.
Gazetari investigativ, Artan Hoxha ka publikuar një audio-përgjim ku tregohej si drejtori i Kadastrës, Artan Lame udhëzonte vartësit e tij në lidhje me procesin e legalizimeve.
Mes të tjerash, në audio dëgjohet të thotë se nga 170 mijë dosje legalizimesh, vetëm 60 mijë bëhen, kurse për mbi 100 mijë të tjerë situata duhet mbajtur varur, pasi mund të humben votat për mazhorancën.
