Ish-eprori i Ushtrisë Çlirimtare të Kosovës, Salih Mustafa, nuk është deklaruar rreth akuzave që janë në aktakuzën e ngritur ndaj tij. Ai u shpreh se nuk do deklarohej rreth kësaj, pasi i duhet që të konsultohet me avokatin.
“Nuk do të deklarohem sot, do të konsultohem me avokatin”, tha ai.
Në seancën ku është paraqitur ish-shefi i Inteligjencës së FSK-së, Salih Mustafa, e që është procesi i parë i tillë i Gjykatës Speciale, Mustafa është pyetur nëse i ka kuptuar akuzat me të cilat rëndohet, dhe ai ka pohuar.
Gjatë kësaj seance është lexuar aktakuza ndaj tij dhe është informuar rreth të drejtave të tij. Gjykatësi i procedurës paraprake prezantoi pikat e aktakuzës me të cilat ngarkohet Salih Mustafa, e që janë katër sosh.
Gjyqtari i procedurës paraprake tha se ka konfirmuar aktakuzën e paraqitur nga Prokurori i Specializuar kundër këtij Mustafës, për katër pika, për ndalim arbitrar, trajtim mizor, torturë dhe vrasje të paligjshme.
