Parlamenti pritet të dorëzojë kërkesën për shkarkimin e presidentit në Gjykatën Kushtetuese. Kuvendi e shkarkoi me 104 vota pro Metën më 9 qershor, me argumentin se ka kryer shkelje të rëndë kushtetuese me deklaratat e tij gjatë fushatës elektorale. Gjykata Kushtetuese pritet të marrë vendimin për shkarkimin e presidentit Ilir Meta nga detyra. Kuvendi do vërë në lëvizje Kushtetuesen, për të vendosur nëse kemi të bëjmë me shkelje të rënda nga ana e presidentit, apo nuk kemi elemente që mund të sjellin shkarkimin e tij.
Gjykata ka 7 anëtarë, dhe i vetmi rezultat që mund të shkarkojë presidentin është që të ketë 5 vota pro Kuvendit. Nëse kemi rezultat 4 me 3, atëherë nuk merret dot vendimi.
Shkarkimin e presidentit Meta, Partia Socialiste e ka konsideruar si një nevojë për të “çliruar Presidencën nga një pengmarrje”. Në kundërpërgjigje, Meta e ka konsideruar vendimin si një veprim të mazhorancës për të larguar vëmendjen nga krimet zgjedhore të zgjedhjeve të 25 prillit. I pyetur se çfarë do të bëjë nëse nga Gjykata Kushtetuese merr vendimin për ta shkarkuar nga detyra, presidenti Meta iu shmang përgjigjes së drejtpërdrejtë, duke thënë se do të jetë në zyrë deri në vitin 2022. Presidenti shtoi se pret me shumë qetësi e durim përfundimin e procesit të ankimimeve për 25 prillin, që të bashkëpunojë me shumicën e re dhe opozitën e re.
Pak ditë më parë, Meta u ndal te shkarkimi i tij nga ana e Kuvendit, djegia e mandateve të opozitës dhe rëndësia që ka për vendin çelja e negociatave për anëtarësimin në BE. Meta dënoi aktin e opozitës për djegien e mandateve, pasi shtoi se nga kjo, vendi mbeti vetëm me një institucion të pavarur, që sipas tij ishte Presidenca.
