Përfaqësuesi i OBSH në Shqipëri Raul Gonzalez Montero ka deklaruar se nevojitet të paktën një vit që të gjendet një vaksinë për koronavirusin.
I ftuar në emisionin “Real Story” në “News 24” ai u bëri apel qytetarëve që të mos përfshihen nga paniku.
“Nuk duhet të kemi panik. Kjo sepse paniku është gjëja më e keqe. Na duhet kohë që të nxjerrim vaksinën. Kemi nevojë për kohë sepse vaksina nuk do jetë e disponueshme menjëherë. Do të duhet një vit që të jetë e disponueshme. Do të duhet kohë dhe kohën e fitojmë duke zbatuar masat e distancave. Për viruse të caktuara mund të duhen 10 vjet, por për këtë virus do na duhet një vit”, tha Montero.
Ky i fundit shtoi se OBSH ndihmon institucionet shqiptare në mënyrë të vazhdueshme: “Ne mbështesim vendet në shumë aspekte. Ne mbështesim vendet që të zhvillojnë laboratorët e tyre. Ne ndihmojmë qeveritë që të bëjnë plane dhe të ndalojnë shpërthimet epidemike. Kemi pasur raporte të afërta me të gjitha vendet evropiane. Kemi punuar në mënyrë të shkëlqyer me qeverinë shqiptare”.
