Një italian, fitues i “Ishullit të të Famshmëve 2019”, do të jetë përfaqësuesi i Shqipërisë në Botërorin e Xhudos. Për çudinë e të gjithëve, xhudisti Marko Madaloni, ka zgjedhur të përfaqësojë Shqipërinë, vendim të cilin e kishte bërë publik që dy muaj më parë, por me sa duket e ka finalizuar me pajisjen me pasaportën shqiptare.
“Pas pak do të filloj të stërvitem, pasi në shtator është Kampionati Botëror në Tokio ku do të vesh fanellën e Shqipërisë dhe jo më atë të Italisë. Tre vite më parë m’u desh të tërhiqesha pasi kisha disa keqkuptime me presidentin e Federatës Italiane. Pastaj takova presidentin e Federatës së Shqipërisë i cili më dha shtetësinë për merita sportive dhe kjo më shtyn të përfaqësoj këtë shtet. Duhet të rifitoj dinjitetin, duhet të tregoj se do të tërhiqem nga ky sport kur e vendos unë”, tha sot xhudisti 34-vjeçar italian.
Në karrierën e tij, ai është shpallur dy herë medalist i bronztë në Kampionatin Botëror të Xhudos, por për çudi, famën më të madhe e mori si pjesëmarrës e pastaj fitues i “Ishullit të të famshmëve 2019”.
