Pas shkarkimit të Rudina Hajdarit, Korab Lita, i zgjedhur në krye të Grupit Demokrat në Kuvend deklaroi sot se deputetja e ka dhënë verbalisht dorëheqjen e saj. Sipas Korab Litës, Hajdarit i është kërkuar të largohet si kryetare Grupi, pasi ka zhgënjyer besimin e deputetëve, pjesëtarë të këtij grupimi parlamentar. Ai tha më tej se nuk do të shkrihet grupi Parlamentar i PD-së, dhe pas përplasjeve të fundit.
“Në datën 10 tetor 2019, është zhvilluar mbledhja e Grupit Parlamentar, ku është diskutuar edhe për funksionimin e Grupit Parlamentar, ku pasi janë bërë prezente të gjitha problemet, i është kërkuar znj., Hajdari që të tërhiqet nga drejtimi i Grupit, dhe të vazhdojë me detyrat e tjera të rëndësishme. Pas bërjes prezente të shpërdorimit të betimit tonë prej 6 muajsh, si në aspektin organizativ, politik dhe ligjor, znj., Hajdari në mënyrë verbale deklaroi dorëheqjen e saj. Pas këtij momenti, grupi kaloi në procesin zgjedhor për zgjedhjen e kryetarit të tij”.
Ai tha se ishin tre kandidatura, por emri i tij u mbështet nga të gjithë të pranishmit në mbledhjen e grupit. “U propozuan tre kandidatura, Alban Zeneli, Halit Valteri dhe Korab Lita. Z. Zeneli u tërhoq nga gara dhe mbetën dy kandidatura, Halit Valteri dhe Korab Lita. Z. Valteri kërkoi kohë për tu takuar me kolegët, për qëllim lobimin për vota. Në unanimitet grupi vendosi ti jepej kohë z. Valteri deri ditën e nesërme, datë 11 tetor. Pasi nuk gjeti mbështetje, z. Valteri deklaroi se tërhiqet dhe më mbështet mua në këtë garë. Për këtë u votua në mënyrë të hapur dhe u firmos nga të gjithë në unanimitet. Pas këtij, në respekt të rregullores është njoftuar kryetari i Kuvendit”.
Mes deputetëve të opozitës së re ka ende paqartësi se kush është kryetari. Një pjesë e deputetëve njohin Rudina Hajdarin si drejtuese, e të tjerë Korab Litën.
Më herët, në një prononcim për “Top Channel”, deputeti Halit Valteri, nënkryetar i grupit i cili hodhi edhe firmën mbi dokumentin që njeh Korab Litën si kryetar, sqaron se gjithçka është një keqkuptim, e që do sqarohet të enjten në seancë plenare.
Ai i qëndron vendimit për tu tërhequr, nëse Kuvendi njeh Korab Litën për kryetar, duke paralajmëruar eskluzivisht për “Top Channel”, se të tjerë deputetë të Kuvendit do i bashkohen grupit demokrat me kryetare Rudina Hajdarin, të enjten në seancë plenare.
“Grupi do zgjerohet me deputetë të rinj, Rudina është kryetare, gjithçka do sqarohet të enjten”, tha Valteri.
