Gazetari Artan Hoxha ka zbuluar detaje të reja për porositësit dhe autorët e vrasjes së ish-policit Santiago Malko në Tiranë, në fund të muajit gusht. Një breshëri plumbash u derdhën mbi makinën e Santiago Malkos, që në fund i morën dhe jetën. Gazetari, duke sjellë në fokus ngjarjen e rëndë, zbuloi se tashmë kemi hyrë në një fazë të re.
Ai paralajmëroi se është vetëm fillimi i një serie ngjarjesh. Krimi i mirëplanifikuar është kryer me pagesë. Po kështu, Hoxha shton më tej se autorët operuan me tre mjete. Pra, atentati ndaj Malkos ishte prioritet dhe se rezulton se u paguan 300 mijë euro. Vrasësit dyshohet se janë nga Vlora.
“Gushti shkoi me ngjarje, janë vrarë bosë të grupeve kriminale. Kanë dalë të rinj, që janë shumë aktiv dhe të ashpër, kanë potencial të madh monetar dhe aktivitetin kryesor e kanë jashtë, në Shqipëri mbledhin kufoma.
Do të kemi mundësi në vijim ta shpjegojmë edhe me detaje. Santiago Malko është përfshirë në shumë episode. Vrasja e tij krijoi një problem të ri në Tiranë, kemi hyrë në një fazë të re, është vetëm fillimi i një serie ngjarjesh.
Kjo duhet të jetë çështja primare, pasi paralajmëron një seri ngjarjes, që uroj mos të ketë pasoja te njerëzit e pafajshëm. Në rastin konkret. Deri tani rezulton të jetë vrasje me pagesë. Tetë muaj para, agjencitë ishin në dijeni duke vendosur shpërblim për vendndodhjen e tij.
Në prill, në 7 apo 8 prill kapet një grup para se të ekzekutonte një person, objektiv ishte Santiago Malko, atëherë u kap një BMW seria 7 me targa ruse.
Ky grup që u bë zhurmë, u lirua në një kohë të shkurtër. Nuk e di si prokurorët hodhën poshtë provat. U pagua një çerek milioni euro që ai grup të ishte në rrugë. Pas 5 muajsh kemi vrasjen e Santiago Malkos. Në vijim do të nxjerrim edhe videot e dinamikës si u vra.
Janë tre makina në vendin e ngjarjes. Një atentat që ka 8-10 persona. Autorët operuan me tre mjete. Kjo do të thotë se goditja e Malkos ishte prioritet, për atentatin rezulton se u paguan 300 mijë euro, vrasësit dyshohet se janë nga Vlora dhe dyshohet se morën pjesë në vrasjen e Edison Harizajt dhe të njëjtët që goditën Ferdinand Llanajn në Vlorë. Pra kemi porositësit dhe ekzekutorët. Në atentat kanë qenë ekzekutorët më vete dhe ndihmësit, pjesa e grupit organizator për ti ndihmuar që të mos dështonin. Santiago Malko duhet të ekzekutohej”, tha ai në emisionin ’45 Minuta’ në Report Tv.
