Ditën e djeshme, në Spanjë është hapur shkolla e parë në gjuhën shqipe dhe ky lajm i ka gëzuar pamasë shqiptarët emigrantë.
Faqja “Shqiptarët në Spanjë” ka njoftuar në Facebook për hapjen e shkollës, duke publikuar foto të aktivitetit.
“Sot ishte një ditë e veçantë për Shqiptarët në Spanjë!!
Më 24 Nëntor të 2019 u çel për herë të parë në Spanjë mësonjëtorja Shqipe. Për ne është një ditë historike dhe një ngjarje e shumëpritur nga të gjithë. Tashmë fëmijët në Madrid, dhe shpresojmë edhe më tej, do të kenë një kënd ku të flasin dhe të luajnë me njëri-tjetrin në Shqip.
Në këtë ditë të parë patën mundësi të vijnë familje nga të gjitha trevat shqipfolëse, nga Shqipëria, Kosova dhe Maqedonia.
U emocionuam kur morëm vesh që kishte familje që kishin ardhur nga skajet më të largëta të Spanjës vetëm e vetëm për të mos humbur këtë ditë të veçantë.
Falenderojmë shumë mësuese Flora Andona Sallabanda për emocionet që na përcolli sot.
Falenderojmë Ambasada e Shqipërisë në Madrid/ Albanian Embassy in Spain dhe Ambasadorin Gazmend Barbullushin për mbështetjen e tyre të vazhdueshme dhe institucionale.
Patjetër edhe anëtarët e Shoqatës së Shqiptarëve në Spanjë, Altin Hyseni, Eridona Brahaj dhe Edland Graci.
Aktivitete të tilla paçim ngahera”, shkruhet në postim.
