Astrit Patozi ka reaguar me anë të një postimi në Facebook, pas largimit të Grida Dumës dhe Alfred Rushajt nga politika. Patozi shkruan se lajmi nuk është largimi i tyre, por arsyeja se përse po largohen këta deputetë.
Sipas tij, për frymë popullsie i bie që më shumë po ikin demokratë nga Parlamenti, se sa shqiptarë drejt Anglisë. Grida Duma njoftoi se ka lënë mandatin e deputetes, ndërsa dilema është se kush do të jetë angazhimi i saj. Lajmeve se ajo mund të bëhet pjesë e botës televizive, nuk i dha asnjë përgjigje. Ajo tha se është e djathtë dhe si e tillë shpreson se do dijë të prodhoj aq sa sa mundet, qoftë edhe me ndërgjegjësime.
Statusi
LAJMI ËSHTË PSE PO IKIN
Po shoh se si po vrapojnë të gjithë për të gjetur se me kë do të bëhen zevendësuesit e Alfred Rushajt dhe Grida Dumës nga lista e grupit parlamentar të PD, me foltoren e Doktorit apo me antifoltoren e “Alibashës”.
Ndërkohë që lajmi është se çfarë ka ndodhur në atë parti, prej së cilës edhe deputetët po largohen në tufa.
Saqë ngjasojnë me ata shqiptarët e dëshpëruar, që lënë atdheun përditë duke kaluar La Manshin me gomone, pa e kthyer fare kokën mbrapa.
Për frymë popullsie i bie që më shumë po ikin demokratë nga parlamenti, se sa shqiptarë drejt Anglisë.
