Pavarësisht debatit në parim, të gjithë anëtarët kanë votuar pro djegies së mandateve, ndërsa tashmë pritet që Basha të mbledhë Këshillin për të marrë një vendim përfundimtar. Vetë kreu i PD ka dalë në një deklaratë për shtyp, ku njoftoi vendimin e marrë nga mbledhja e grupit parlamentar të PD-së.
Ish-kryeministri Sali Berisha është shprehur po ashtu pro djegies së mandateve, vendim ky i marrë unanimisht tashmë nga Partia Demokratike.
Gjatë fjalës së tij në mbledhjen e grupit parlamentar, Berisha ka deklaruar se duhen akte që çojnë në rrëzimin e kryeministrit Edi Rama dhe që shqiptarët të jenë të lirë.
“Duhet të ndërmarrim çdo akt që na çon tek rrëzimi i Ramës. Prova e këtij vendimi është, nëse ne me aksionin qytetar politik do t’u kthejmë shqiptareve votën e lirë, ne kemi marrë një vendim historik të drejtë. Po nuk arritëm që shqiptarët të votojnë të lirë, mbetemi fasadë. Nëse shkohet në këtë vendim, që nuk e kundërshtoj, përkundrazi, koha ka ardhur që të përballemi me këtë regjim me qëllimin e vetëm që shqiptarët të jenë të lirë”, ka deklaruar Berisha në mbledhjen e grupit të PD.
