Partia Demokratike ka sulmuar sërish ish-kryeministrin Berisha, si një person “non grata” që kërkon vota për LSI dhe sulmon PD. Në një postim në Facebook në llogarinë e PD, shkruhet se Berisha po gënjen e mashtron dhe se çdo votë për kandidatët e “Shtëpisë së Ilirit”, është votë për Edi Ramën. Po sipas PD-së, Berisha do ti përdorë demokratët për qëllimet e tij, dhe aleatëve për Metën. Dhe në fund është ripërsëritur mesazhi që është përçuar kohët e fundit, se çdo votë për Berishën e Metën, mban Ramën.
“Non Grata kërkon vota për logon e LSI dhe sulmon Logon e PD. Non grata është në hall të madh. Sa më shumë i rritet halli, aq më shumë gënjen e mashtron. Sa më shume bashkohen demokratët, aq më shumë i sulmon burracaku. Siç e ka bërë vetë të qartë non grata, çdo votë për kandidatët e Shtëpisë së Ilirit, është votë për Edi Ramën, njësoj si në vitin 2013. Non grata do ti përdorë demokratët për hallin e tij dhe aleatëve të tij për partinë e re të Shtëpisë së Ilirit. Aleatët brenda shtëpisë së Ilirit, shantazhojnë njëri tjetrin dhe janë peng i korrupsionit të tyre. Çdo votë për Berishën e Metën, mban Ramën”.
