Sekretari i Përgjithshëm i Partisë Demokratike, Gazment Bardhi deklaroi se partia e re “Bindja Demokratike” nuk mund të marrë pjesë në zgjedhje, pasi nuk është regjistruar akoma në gjykatë, teksa thekson që afati i regjistrimit të partive për të marrë pjesë në zgjedhjet lokale ka përfunduar ditën e djeshme.
“Opozitar të bën vetëm veprimtaria politike. Sa për pjesëmarrjen në zgjedhje, në përputhje më kushtetutën dhe ligjin, kjo parti nuk merr dot pjesë në zgjedhje, sepse nuk është regjistruar akoma në gjykatë, ndërkohë, që afati i regjistrimit të partive politike për të marrë pjesë në zgjedhje ka përfunduar dje”, u shpreh ai.
Në një intervistë për “ABC News”, Bardhi akuzoi drejtpërdrejt Astrit Patozin se po i shpërben vetëm interesit të kryeministrit Edi Rama, ndërsa theksoi se PD është e vendosur për të pamundësuar zgjedhje fallco në Shqipëri.
“Zoti Patozi ishte në studion tuaj dhe po të më thoni apo të mbani mend ndonjë fjali që tha kundër Edi Ramës, ju lutem, ma kujtoni. Ma thoni! Në 30 minuta në intervistën tuaj, foli vetëm kundër PD, nuk foli kundër Edi Ramës. Prandaj, duhet të jemi të sinqertë me shqiptarët. Opozitar të bën vetëm veprimtaria politike. Sa për pjesëmarrjen në zgjedhje, në përputhje më kushtetutën dhe ligjin, kjo parti nuk merr dot pjesë në zgjedhje, sepse nuk është regjistruar akoma në gjykatë, ndërkohë, që afati i regjistrimit të partive politike për të marrë pjesë në zgjedhje ka përfunduar dje. Nëse Edi Rama, për interesat e veta, do të urdhërojë politikisht anëtarët e vet në KQZ që të shkelin ligjin për ta regjistruar këtë parti, besoj se ua qartëson shpejt shqiptarëve nevojën për krijimin e kësaj partie”, tha Bardhi.
