Ish-deputetja e Partisë Demokratike, Dhurata Çupi, ka komentuar përgjimet e publikuara nga gazeta gjermane “Bild”, e po kështu ka folur lidhur me aktualitetin politik dhe protestën e nesërmes të opozitës.
“Ka ditë që opinioni publik është i tronditur nga publikimi i videove të ‘Bild’. Pavarësisht se brenda vendit mund të kemi kontradikta opozitë-mazhorancë, lajmet që publikohen nga ndërkombëtarët, nuk i bëjnë mirë vendit. Ndaj mendoj se ky është një lajm tronditës dhe i trishtueshëm”.
E ftuar në studion e “FaxNews”, ajo tha se PD është pro dialogut, por me socialistët e ndershëm.
“Partia Demokratike e ka pranuar që jemi për dialog, por me socialistët e ndershëm, jo me këtë parti që është tani dhe një kryeministër që nuk përfaqëson shqiptarët.
Ndërkombëtarët janë ata që në bazë të denoncimeve të opozitës, kanë vijuar më tej. Edhe ndërkombëtarët nuk e perceptojnë më qeverinë si legjitime, sepse janë gati të rikthejnë vizat, apo edhe të tjera veprime si këto. Ndërkombëtarët janë në sinkron me PD”.
