Reforma territoriale është një nga pikat kryesore të aksionit politik që do të nisë këtë shtator, me Kuvendin e ri. PD dhe PS pritet të ulen bashkë për ndryshimin e reformës territoriale. Më herët, kryeministri Rama e aprovoi faktin se është i gatshëm për të bashkëpunuar, dhe kjo ka sjellë një sërë reagimesh politike.
Ish-kandidati për deputet, Roland Bejko, në një dalje televizive u shpreh se 2/3 e bashkive u krijuan për interesa politike. Prandaj, sipas Bejkos, duhet që palët politike të ulen dhe të diskutojnë ndarjen e re territoriale.
Roland Bejko, i caktuari nga PD-ja si përgjegjës për procesin e reformës territoriale, ka pranuar publikisht se do të ulet në tryezë me kryeministrin Edi Rama për të folur në lidhje me këtë çështje. “Pa diskutim që duhet bashkëpunim dhe ne këtë kemi kërkuar që në fillim. Ne nuk vemi me kushte, ne nuk themi që do bëjmë 100 apo 120 komuna sepse kjo e zgjidh çështjen. Ne ecim sipas Kushtetutës. Kushtetuta thotë se duhet dialog politik. Politikisht themi. Mendojmë se dy të tretat e bashkive u krijuan për interesa politike. Prandaj ne themi ulemi në një tryezë, së bashku me shoqërinë civile dhe të diskutojmë mbi ndarjen e re territoriale, siç e përcakton Kushtetueta e Shqipërisë. Ne do shikojmë se nëse argumentat e z. Rama janë të tilla, se duke pasur bashkëpunim na sjell më shumë demokraci, bujrum ta bëjmë. Ky do të jetë një dialog që do bëhet dhe me specialistë për ndryshimin territorial. Një tryezë e gjerë që kur të bëhet kjo reformë, të mos diskutohet më për të vendosur dorë”, tha Bejko.
Lëvizja Socialiste për Integrim duket se është jashtë loje, sa u përket diskutimeve për reformën territoriale. Nënkryetari i LSI, Petrit Vasili është shprehur se pa u zgjidhur çështja e 25 prillit, nuk do të zgjidhet asnjë tjetër. /Tirana Today
