Partia Demokratike ka bërë me dije se janë anuluar të gjitha aktivitetet e planifikuara për 11 dhjetorin, ditën e themelimit të partisë.
Përmes një njoftimi të shpërndarë për mediat, PD thekson se të gjitha fondet e përcaktuara për këtë ditë do të shkojnë për familjet e prekura nga tërmeti i 26 nëntorit.
Sipas këtij njoftimi, që nga tërmeti i 26 nëntorit PD ka anuluar disa aktivitete kombëtare për t’ju përkushtuar me mundësitë dhe burimet e saj njerëzore situatës në terren.
Njoftimi i plotë:
Aktivitetet e planifikuara për 11 dhjetorin, ditën e themelimit të Partisë Demokratike janë anuluar, dhe të gjitha fondet e përcaktuara për këto aktivitete se bashku me kontribute të anëtarëve dhe simpatizantëve të saj do të shkojnë në ndihmë të personave të goditur nga tërmeti i 26 Nentorit.
Solidariteti me të dëmtuarit nga tërmeti dhe mbështetja maksimale për ta është mënyra më e mirë për të përkujtuar data të rëndësishme që shënojnë ngjarjet e Dhjetorit 1990, nga Lëvizja Studentore tek shpallja e pluralizmit dhe lindja e Partisë Demokratike.
Që prej tërmetit të 26 nëntorit Partia Demokratike ka anuluar disa aktivitete kombëtare per t’ju përkushtuar me të gjitha mundësitë dhe burimet e saj njerëzore situatës pas tërmetit në terren pranë njerëzve në emergjencë. Më herët Partia Demokratike anuloi aktivitetet për 28 nëntorin, kreu i demokratëve anuloi vizita te parashikuara jashtë vendit ndërsa në Ditën e Rinisë me 8 dhjetor, të rinjtë e Forumit Rinor e kthyen në ditë solidariteti duke mbledhur dhe shpërndarë ndihma për familjet e goditura nga tërmeti.
