Koordinatori i Bindjes Demokratike, Astrit Patozi, ka shfryrë dufin ndaj demokratëve, të cilët shpërthyen ndaj deputetes Rudina Hajdari. Komentin e tij të radhës, të cilën e ka shpërndarë në Facebook, e titullon: “Nuk kanë faj, e dinë që opozita është pronë ose leje ndërtimi”.
Një incident ndodhi sot në Shkodër, ku një prej nxënësve të shkollës ‘Shejnaze Juka’, i ka thënë Rudinës se ajo nuk e njeh të atin e saj Azem Hajdarin, dhe se mbron kryeministrin Edi Rama.
Ndërsa po fliste deputetja, një djalë i ri nga forumi rinor i Partisë Demokratike që nuk ishte pjesë e shkollës, u fut në sallë dhe iu drejtua Hajdarit: “E njeh Azem Hajdarin. Ai ka luftuar për të sjellë demokracinë, ndërsa ti po kthen komunizmin. Shtojca e Edi Ramës, je turpi i shqiptarëve”.
Hajdari e ka kaluar incidentin me humor, dhe i ka bërë thirrje të rinjve që të mos ndikohen nga politika. Patozi citon se nuk duhet të çuditemi kur të shikojmë skena të neveritshme si ajo me djalin nga Shkodra, që i hakërrehej Rudina Hajdarit.
Statusi
NUK KANË FAJ, E DINË QË OPOZITA ËSHTË PRONË OSE LEJE NDËRTIMI
Janë më shumë të marrë, se sa të poshtër, dhe për këtë nuk duhen marrë asnjëherë seriozisht.
Ata mendojnë se opozita është pronë, leje ndërtimi apo tender, që ka nevojë patjetër për firmën e tyre, sepse vetëm kështu e konceptojnë politikën dhe atë që vjen prej saj.
Ndaj edhe mos u çudisni, kur të shikoni skena të neveritshme si ajo me atë trimin nga Shkodra, që i hakërrehej Rudina Hajdarit se përse ajo nuk e njihte tamam babain e vet, ashtu si ai vetë.
Në fakt është e vetmja gjë që u ka ngelur për të bërë, pas një serie të pashembullt revolucionesh të premtuara, të cilat, ose nuk kanë shpërthyer kurrë, ose kanë ngrënë bijtë e vet.
Është një reagim i ngjashëm me ato bishat e uritura, të cilat në ruajtje të territorit, që u zvogëlohet përditë, shenjojnë duke përmjerrur hapësirën e tyre, ku nuk duhet të shkelin të tjerët.
Në shqip mund të thuhet edhe “tokë e xanun”.
