Krijimi i Bindjes Demokratike dhe më pas vendimi për t’u regjistruar në zgjedhjet lokale të 30 Qershorit e kanë reklamuar Bindjen Demokratike ndaj sulmeve verbale politike kryesisht nga partia mëmë. Astrit Patozi, koordinatori i Partisë Bindja Demokratike, ka qenë i ftuar në Top Talk pikërisht për të sqaruar disa nga këto rrethana.
I pyetur në lidhje me akuzat e opozitës jashtëparlamentare se regjistrimi i Bindjes Demokratike në zgjedhjet e 30 qershorit është i paligjshëm, Patozi u përgjigj:
“Ne kemi kapur të gjitha afatet, e kemi respektuar të gjitha ligjet e vendit për t’u regjistruar dhe për të garuar si parti politike në zgjedhjet e 30 qershorit. Gjithçka thuhet është ngutja e një force politike të vjetër, e cila më shumë e ka problem që po hyjmë ne në zgjedhje, se sa që nuk merr vetë pjesë në to”, tha Astrit Patozi, koordinatori i Partisë Bindja Demokratike, duke theksuar se ky është problemi me këtë lloj akuze.
Një prej akuzave të Partisë Demokratike për paligjshmërinë e regjistrimit të Bindjes Demokratike është fakti se sipas tyre BD ka vetëm një deputet në Kuvend dhe ai është Andi Përmeti, i cili nuk i ka kaluar 6 muaj në këtë post.
Astrit Patozi sqaron se partia e tij nuk ka pasur një, por dy deputetë të gatshëm për të firmosur që kjo forcë politike të garojë në zgjedhje.
Po ashtu, Astrit Patozi, theksoi se Bindja Demokratike nuk është për t’u mëshiruar dhe nuk është një zë i vogël, pasi në të kundërt PD nuk do të kishte interes që ta sulmonte atë më shumë se sa vetë qeverinë.
“Ne po garojmë, ata thonë se po u marrim njerëz. Le të vijnë edhe ata. Ne do marrim pjesën tonë”, u shpreh Astrit Patozi, duke nënvizuar se PD i ka lënë në një farë forme mbështetësit e saj në mes të rrugës.
I pyetur nëse do të mund të ketë një aleancë me PD, Patozi u përgjigj: “E para nuk mund të bëjmë koalicion me diçka që nuk ekziston. Mund të mendonim një koalicion të mundshëm me një forcë politike që është regjistruar në zgjedhje, por jo me një që thotë nuk do të ketë zgjedhje”.
Më tej Patozi shton se “Ne nuk kemi asnjë konsideratë. Ne duam që ky projekt i ri politik, të perceptohet të ndjehet nga njerëzit e të provohet”.
Por i ngacmuar se nëse Bindja Demokratike do të mund të bashkëpunojë me Partinë Socialiste, Astrit Patozi shprehet se forcën e tij politike nuk e lidh asgjë, e se janë rivalë.
“Bindja Demokratike nuk ka asgjë me PS dhe e ka kundërshtarin e saj kryesor. Nëse PD, na godet ne dhe jo PS, në këto momente është problem i tyre, jo i joni. Nëse ata nuk do të merreshin me ne, ne nuk do të thoshim asnjë fjalë për PD dhe LSI. Kjo e dyta, nuk ka thënë asgjë, as kundër dhe as pro”, tha patozi.
Më tej Koordinatori i BD, theksoi se në “betejë” me PS, kjo e fundit i ka hequr nga lista një kandidat nga gara për kryetar bashkie. Sipas tij, tërheqja nga gara e kandidatit të tyre për Skraparin ka ardhur pas presioneve nga Partia Socialiste.
Arben Skënderaj do të jetë kandidati i Bindjes Demokratike për Bashkinë e Tiranës përballë Erion Veliajt, e për Astrit Patozin ai është më i miri./ Top Channel
