Kryeministri i Kosovës, Avdullah Hoti, pritet që të mbajë paraditen e sotme një konferencë për media. Zyra e kryeministrit ka bërë me dije se kjo konferencë vjen pas vizitës së tij në Bruksel.
“Kryeministri Avdullah Hoti, pas kthimit nga vizita zyrtare në Bruksel, do të mbajë konferencë për media”, thuhet në njoftim.
Hoti pritet që të raportojë në lidhje me takimin në Bruksel, edhe në Komisionin për Integrim Evropian.
Kryetari i komisionit për Integrim Evropian, Ismet Beqiri, ka thënë se Hoti e ka për detyrë që të raportojë në Kuvend sa i përket takimit në Bruksel.
“Procesi Integrimit është një proces që çdo ministri ka rolin e vet dhe roli jonë si komision mbikëqyrës ministrive të ndryshme. Ne i kemi shtëpitë e ndara dhe partia juaj i bënë punët e veta dhe ne punët tona. Unë kam biseduar me kryeministrin dhe do të jetë dikush që do të flasë për këtë, por kryeministri më vonë e ka obligim që të vi edhe në Kuvend”.
Ditët e fundit ka patur zhvillime të rëndësishme në Kosovë. Zyra e Prokurorit të Specializuar në Hagë, ka njoftuar se ka ngritur aktakuza ndaj presidentit Hashim Thaçi, kreut të PDK, Kadri Veseli dhe disa zyrtarëve të tjerë, për krime lufte.
Në njoftimin e bërë publik nga Zyra e Prokurorit Special, bëhet e qartë se aktakuzat përmbajnë dyshim për përgjegjësi penale për rreth 100 vrasje. Ata janë të dyshuar për krime kundër njerëzimit dhe krime lufte ndër të cilat, vrasje të paligjshme, zhdukje e detyruar e personave, përndjekje dhe tortura.
Sakaq, presidenti Aleksandër Vuçiç thotë se Serbia duhet të tregojë përmbajtje, pasi sipas tij, serbët e dinë se kanë ndodhur krime të tmerrshme gjatë kohës së luftës në Kosovë.
