Kryeministri Edi Rama ka reaguar në lidhje me deklaratën e Unionit Kristiandemokrat dhe Kristiansocial (CDU/CSU), të cilët shprehën shqetësimin e tyre për krizën e brendshme politike në Shqipëri dhe për zgjedhjet lokale që do të zhvillohen pa opozitën, ndërsa sugjeruan edhe shtyrjen e datës së zgjedhjeve.
Rama, përmes një postimi në “Twitter” shfaqet falënderues për vëmendjen e tyre ndaj situatës politike, teksa i quan “miq të Shqipërisë”.
Ndër të tjera, dakordësohet me gjithçka kanë shprehur publikisht dhe për nevojën e dialogut pa kushte.
“U jam shumë falënderues miqve të Shqipërisë dhe partnerëve politikë të LB&PD në CDU/CSU, për vëmendjen e tyre ndaj situatës politike! Krejt dakord me gjithçka kanë shprehur publikisht dhe për nevojën e dialogut pa kushte. Koha nuk pret sepse 30 qershori s’është në dorën tonë”, shkruan Rama.
