Ministri italian i Punëve të Jashtme, Luigi Di Maio pritet të vizitojë ditën e nesërme Shqipërinë. Lajmi bëhet i ditur nga Ambasada e Italisë.
“Ministri i Punëve të Jashtme dhe i Bashkëpunimit Ndërkombëtar, Luigi Di Maio, ditën e mërkurë datë 11 dhjetor, do të kryejë një vizitë në Shqipëri gjatë së cilës do të takohet me Presidentin e Republikës së Shqipërisë, Ilir Meta, dhe me Kryeministrin dhe Ministrin e Punëve të Jashtme, Edi Rama”, thuhet në njoftim.
Po ashtu, në përfundim të takimit me kryeministrin Edi Rama pritet të mbahet edhe një konferencë e përbashkët. Mësohet se ministri italian do të kryejë një vizitë edhe në kampin e çadrave pranë Vorës, aty ku janë strehuar një pjesë e banorëve të prekur nga tërmeti i 26 nëntorit.
“Pas tërmetit të fortë që goditi Shqipërinë në datën 26 nëntor, Ministri Di Maio do të kryejë një vizitë edhe në kampin e çadrave pranë qytezës së Vorës si dhe do të marrë pjesë në ceremoninë e dhurimit të materialeve të nevojshme të shpëtimit për të përballuar katastrofat dhe situatat e emergjencës të dhuruara nga Emergjencat Civile italiane”, njofton Ambasada e Italiasë.
