Zbardhen detaje të reja në lidhje me ngjarjen e rëndë të ndodhur mesditen e sotme pranë Gjykatës së Lartë në kryeqytet, ku 52-vjeçari Mexhit Picari vrau me armë zjarri ish-bashkëshortin e vajzës Kudret Aliaj, dhe plagosi avokatin e tij Adriatik Cara.
Në dëshminë e dhënë para hetuesve, Picari ka deklaruar se me viktimën kishte konflikte të vazhdueshme, pasi ky i fundit u nda nga vajza e tij.
Ai tha se pas ndarjes, i kishte kërcënuar vazhdimisht, dhe se kjo ishte arsyeja pse ai e mbante gjithmonë me vete armën.
52-vjeçari u shpreh se ditën e sotme u përball me ish-dhëndrin e fundit, dhe pasi ai i ofendoi vajzën e qëlloi duke e lënë të vdekur.
”Me Kudretin kishim konflikte të vazhdueshme prej muajsh. Pasi u nda nga vajza dhe ma solli në shtepi pa e lejuar të shohë fëmijët, ai ka vijuar të na kërcenojë dhe ofendojë. Ka ardhur tek shtepia dhe tek biznesi disa herë. Për shkak të kërcenimeve, unë mbaja armën me vete. Sot kam shkuar të shoqeroja vajzën për në gjykatë sepse kishte seancen. Aty u përballa me Kudretin. Ai ofendoi vajzen time dhe unë e qellova. Pas krimit kam hedhur armën dhe jam larguar drejt Unazes se Re në shtepinë e motrës”, tha ai.
Si ndodhi vrasja
Në orën 12:00, bashkëshortët Saliaj do të zhvillonin seancën e radhës të divorcit në Gjykatën e Tiranës. Në pritje të nisjes së saj, palët po pinin kafe në të njëjtin lokal në zonën e ish-Ekspozitës në kryeqytet. Ngjarja ndodhi 10 minuta para seancës gjyqësore për ndarjen e çiftit.
Në momentin e ngjarjes, Mexhiti dhe Dhurata kanë qenë ulur në lokal, ndërsa në një karrige tjetër disa metra më tej ishin ulur Kudret Saliaj me avokatin e tij Adriatik Cama.
Picari është ngritur nga tavolina dhe duke nxjerrë pistoletën, ndërsa ka qëlluar 8 herë në drejtim të tij. 5 nga plumbat kanë goditur Saliajn dhe 1 tjetër avokatin e tij, Adriatik Camën. Pasi vrau Saliajn, Mexhit Picari është larguar në këmbë me shpejtësi nga vendi i ngjarjes, ndërsa pas tij u largua edhe Dhurata, ish-bashkëshortja e viktimës.
