Kuvendi ka zyrtarizuar mbajtjen e seancës së jashtëzakonshme pasditen e së nesërmes. Sipas njoftimit për shtyp të Parlamentit, theksohet se kryeministri Rama ka bërë kërkesën me shkrim për thirrjen e këtij sesioni.
Në rendin e ditës së këtij sesioni do të jenë të parashtruara votimi i dekreteve të Presidentit për lirimin dhe emërimin e zëvendëskryeministrit dhe të 6 ministrave; shqyrtimin dhe miratimin e paketës ligjore që ka lidhje me reformën zgjedhore; miratimin e anëtarëve të pakicës parlamentare në 3 komisionet ad-hoc të Vettingut, caktimin e zëvendësuesve dhe zgjedhjen e kryetarit dhe një anëtari të KQZ-së.
“Për Kërkesën e Kryeministrit për mbledhjen e Kuvendit për zhvillimin e një sesioni të jashtëzakonshëm
Bazuar në nenin 74 të Kushtetutës dhe në nenin 42 të Rregullores së Kuvendit, Kryeministri i Republikës së Shqipërisë z. Edi Rama, i ka drejtuar Kuvendit një kërkesë të motivuar me shkrim për thirrjen e Kuvendit në sesion të jashtëzakonshëm. Kërkesa ka përcaktuar që thirrja e Kuvendit në sesion të jashtëzakonshëm të zhvillohet ditën e hënë, më datë 22 maj 2017, në orën 18.00.
Rendi i ditës i seancës plenare do të përmbajë diskutimin dhe votimin e çështjeve për vënien në zbatim të Marrëveshjes Politike të datës 18 maj 2017, lidhur me:
Votimin e dekreteve të Presidentit të Republikës për lirim dhe emërim të zëvendëskryeministrit dhe të 6 ministrave;
Shqyrtimin dhe miratimin e paketës ligjore që ka lidhje me reformën zgjedhore;
Miratimin e anëtarëve të pakicës parlamentare në 3 komisionet ad hoc të vettingut, si dhe caktimin e zëvendësuesve;
Zgjedhjen e Kryetarit dhe një anëtari të KQZ-së.
Në përputhje me Rregulloren e Kuvendit dhe afatet e parashikuara në të, Kryetari i Kuvendit do të nxjerrë urdhrin për mbledhjen e Kuvendit në sesion të jashtëzakonshëm dhe do të publikojë rendin e ditës”, thuhet në njoftimin e Kuvendit”, thuhet në njoftimin e Kuvendit.
