Pas dëmtimit të futbollistit Elseid Hysaj, mbrëmjen e djeshme në ndeshjen kundër Torinos, ka ardhur edhe vetë reagimi i kapitenit të Shqipërisë.
Përmes një postimi në Instagram, Hysaj i falenderon të gjithë duke theksuar se ndodhet në gjendje të mirë shëndetësore.
“Faleminderit të gjithëve për mesazhet, falenderoj Zotin, që jam mirë. Gjithmonë forca Napoli”, shkruan Hysaj.
Nga ana tjetër mësohet se trajneri i kombëtares shqiptare, Edi Reja, ka telefonuar stafin mjekësor të Napolit për të mësuar diçka më shumë në lidhje me situatën e mbrojtësit.
Mjekët i kanë komunikuar trajnerit se shkodrani nuk do të jetë gati për dy sfidat e radhës të Shqipërisë me Turqinë dhe Moldavinë. Bëhet me dije se mjekët italianë kanë vendosur që për 20 ditë, Hysaj të mos dalë në fushën e lojës.
