Në kohën kur frika nga pandemia është ende e madhe, pavarësisht vaksinimeve, nga Kina vijinë sërish lajme aspak të mira. Kina ka konfirmuar infektimin e një njeriu me një variant të ri të gripit të shpendëve. Lajmin në fjalë e ka përcjellë Qeveria e Kinës, duke thënë se një person ka marrë gripin e shpendëve, variantin H10N3.
Po kështu bëhet me dije se rreziku i përhapjes në shkallë të gjerë është i ulët. Ky besohet të jetë rasti i parë i infektimit të një njeriu me H10N3. Pacienti, 41 vjeç, nga qyteti Zhenjiang, është shtruar në spital më 28 prill dhe është në gjendje të qëndrueshme, njoftoi të martën Komisioni Kombëtar i Shëndetit.
“Ky infektim është një transmetim aksidental midis specieve”, tha ky Komision. Sipas tij, “rreziku i transmetimit në shkallë të gjerë është jashtëzakonisht i ulët”. Sipas Organizatës së Ushqimit dhe Bujqësisë të Kombeve të Bashkuara, gripi i shpendëve H7N9 ka infektuar 1,668 njerëz qysh në vitin 2013. Nga ta, 616 kanë ndërruar jetë.
Epidemia e fundit njerëzore nga gripi i shpendëve H7N9 ka ndodhur në Kinë, nga fundi i vitit 2016 deri më 2017. Varianti i ri i gripit të shpendëve pason pas koronavirusit vdekjeprurës.
Rasti i parë me COVID-19 llogaritet të jetë shënuar më 17 nëntor të vitit 2019. Autoritetet kineze bënë çështë e mundur, për të fshehur përhapjen e gripit në javët e tij të para, përfshirë kritikat ndaj mjekëve që tentuan të njoftonin kolegët për virusin e ri të ngjashëm me Sarsin në qytetin Wuhan në provincën Hubei.
