Pas betimit të tij si kryetari i ri i Bashkisë së Kamzës, Rakip Suli foli për mediat, duke u shprehur se kryefjala e tij është puna dhe shërbimi për çdo qytetar, pa dallime politike.
Suli u shpreh besimplotë sa i përket skuadrës së tij, teksa deklaron se ndihet krenar për faktin se Këshilli i ri përbëhet mbi 50 për qind femra dhe mbi 60 për qind të rinj dhe të reja.
“Na pret një rrugë e gjatë dhe me sfida. Shpreh mirënjohejn time më të madhe për qytetarët e Kamzës dhe Paskuqanit, të cilët u shantazhuan me 30 qershor, por nuk u lëkundën në mbrojtjen e familjes së tyre, jam mirënjohës për skuadrën e 30 qershorit. Jam krenar që këshilli i ri përbëhet mbi 50 për qind femra dhe mbi 60 për qind të rinj dhe të reja. Ne kemi bindjen absolute dhe me një skuadër absolute ne do t’ia dalim. Do t’ia dalim dhe do të bëjmë më të mirën për qytetarët e Kamzës dhe të Paskuqani,. Do të shërbej me përgjegjësi dhe me dinjitet. Ne nuk i ndajmë njerëzit në të majtë dhe në të djathtë, por ne jemi për t’iu shërbyer qytetarëve”, tha Suli.
Ndërkohë, mësohet se mbështetësit e Partisë Demokratike janë mbledhur para godinës së bashkisë së Kamzës, duke paralajmëruar se nuk do të lejojnë që Rakip Suli të hyjë në zyrë.
Ata janë shprehur se do të qëndrojnë para godinës dhe nuk do të lejojnë hyrjen e kreut të ri të bashkisë, i dalë nga zgjedhjet e 3o qershorit, pasi sipas tyre procesi ishte antiligjor dhe aspak kushtetues.
