Liderët e vendeve të Bashkimit Europian refuzuan sërish hapjen e negociatave për Shqipërinë. Presidenti francez Emannuel Macron, ndryshe nga pjesa më e madhe e vendeve anëtare, doli kundër zgjerimit të BE-së. Kjo pasi sipas tij, progresi i Shqipërisë dhe Maqedonisë së Veriut nuk mjafton dhe se më parë duhet reformim i brendshëm i BE-së. Po ashtu, kundër Shqipërisë janë pozicionuar edhe Holanda me Danimarkën.
Ndërkohë që bisedimet për hapjen e negociatave janë shtyrë për pranverën e vitit të ardhshëm, sot aktorët politikë janë duke shënjuar me gisht fajtorët. Pasi veç kjo iu ka mbetur, të quajnë fajtorë forcën kundërshtare dhe të mos marrin asnjë përgjegjësi personale.
Edhe pse qëndrimi i Francës veçanërisht, u bë i ditur disa ditë para se të jepej versioni zyrtar nga KE, kryeministri Rama deri ditën e fundit ka qenë optimist. Të paktën nëpër media. Por, çfarë menduan vetë shqiptarët se do të ndodhte me hapjen e negociatave?
Tirana Today pyeti qytetarët në një sondazh, lidhur me rrugëtimin e Shqipërisë drejt Bashkimit Europian.
2475 votues morën pjesë në sondazhin me pyetje “A do të hapen për Shqipërinë negociatat e anëtarësimit në tetor?”
Dhe shumica e qytetarëve e kanë parashikuar qartë se sërish do të kishim një refuzim. Më pak ishin ata të cilët besonin se situata ishte në favor të Shqipërisë. Dhe se do të kishte hapje negociatash.
Ndërkohë, edhe pse në një numër më të vogël, disa qytetarë kanë pasur besim se negociatat do të hapeshin për Maqedoninë e Veriut. Edhe pse kjo e fundit arriti të zgjidhte një nga problemet më të mëdha me Greqinë, çështjen e emrit, përsëri nuk u pranua.
Votimi i shqiptarëve
Jo, përsëri do të ketë shtyrje- 1372 vota ose 55.43%
Po, situata duket premtuese- 732 vota ose 29.58%
Po, por për Maqedoninë e Veriut- 371 vota ose 14.99%
Kriza e rëndë politike, ekonomia e ulët, emigrimi i lartë e shumë probleme të tjera; duket se i kanë bërë shqiptarët skeptikë edhe për mundësinë e hapjes së negociatave.
Të paktën në kushtet që ndodhet vendi tani, është e vështirë të kemi një pranim unanim nga shtetet e Bashkimit Europian. E tanimë, shqiptarëve i mbetet veçse të presin. Nëse politika do të marr ndonjë mësim nga kjo gjë, e do të zërë mënd për datën e radhës të bisedimeve./ TIRANA TODAY