Sekretari i përgjithshëm i Partisë Demokratike, Gazmend Bardhi ka deklaruar se Bindja Demokratike nuk do të marrë pjesë në zgjedhje teksa pritet që KQZ t të marrë vendimin për ta përjashtuar këtë parti nga procesi zgjedhor për shkak të shkeljeve ligjore.
I ftuar në emisionin “Debati në Channel One”, Bardhi tha se KQZ pritet të mos i quajë të rregullt hapat juridikë të partisë së Patozit.
Sipas tij, vendimi i formës së prerë të kësaj partie merret pasi kalon afati i ankimimit që është 15 ditë. Madje KQZ ka një precedent të ngjashëm në vitin 2015 duke përjashtuar një parti nga zgjedhjet për të njëjtën arsye. Ja arsyetimi i plotë juridik i Gazment Bardhit.
“Në përputhje me ligjin, edhe pse ndonëse është regjistruar nuk mund të marrë pjesë në zgjedhje, nëse zgjedhjet do të mbahen më 30 qershor. Sepse në përputhje me ligjin konsiderohet e paregjistruar. Sepse vendimi për regjistrimin e një partie merr formë të prerë vetëm pasi kalon afati i ankimimit që është 15 ditë. Ndërkohë që Komisioni Qendror i Zgjedhjeve duhet të shprehet brenda 5 ditëve, pra brenda 5 ditëve duhet të marrë vendim. Ka një veprimtari të Komisionit Qendror të Zgjedhjeve në vitet e shkuara, në vitin 2015. Pra ka precedent ku parti nuk janë regjistruar edhe pse kanë qenë në një hap më të avancuar se partia Bindja Demokratike. Në mos gaboj ka qenë partia “Shkodra 2015” në zgjedhjet lokale. Me sa mbaj mend vendimmarrjen e Komisionit Qendror të Zgjedhjeve, bëhej fjalë për një parti që ishte regjistruar në gjykatë më datën 8 prill të 2015, afati i fundit për regjistrim ishte 10 prill 2015, pra ishte në një fazë më të avancuar se partia e Patozit dhe KQZ diku më 16 prill ka vendosur që sa kohë nuk ka marrë formë të prerë vendimi i regjistrimit, kjo parti nuk mund të regjistrohet. Votimi i KQZ ka qenë 7 me 0. Mund të jepen gjithashtu fakte ne lidhje me firmat. Ju nxis ju gazetarëve të verifikoni kush ka firmosur për krijimin e kësaj partie. Ligjërisht kjo parti nuk regjistrohet dot në zgjedhje. Unë kam besim të plotë te KQZ, jo vetëm te Klement Zguri që është kryetar dhe te cilido anëtar vendos ligjin mbi interesin apo urdhrin partiak të Edi Ramës”, deklaroi Bardhi.
