Mjeku i njohur Tritan Kalo thotë se pavarësisht shifrave të ulta të rasteve të reja me COVID-19, qytetarët duhet të jenë vigjilent. Ai kërkoi nga qytetarët që të mos entuziasmohen, përsa kohë nuk ka një vaksinë që ti japë fund koronavirusit.
“Shifra 4 përkon me numrin 4 të rasteve të para. Me të infektuarit e parë në mars. Por shifra e ulur nuk duhet të na shtyj drejt një optimizmi të rremë, por duhet të na bëjë më vigjilentë”, tha Kalo në një lidhje direkte me Eni Vasilin.
Më tej, mjeku deklaroi se duke respektuar masat si higjenën dhe distancimin fizik, e mbajmë COVID-19 sa më larg. “Nëse respektojmë distancimin fizik, të mos neglizhohet higjena dhe hapja të jetë e kujdesshme bashkë me sjelljen tonë. Kjo do na shtyjë drejt optimizmit real. Ditët në vijim me hapjen që po ndodh, me liberalizimin e masave do të fitojmë një pamje reale të asaj çfarë ndodh në popullatë.
Kujdesi ndaj vetes, ndaj distancimit fizik, ndaj higjenës e rikthimi në punë duke zbatuar masat, shpresojmë mos të kemi përplasje me këtë infeksion”, shtoi mjeku Tritan Kalo.
