Kryeministri Edi Rama, teksa ka përsëritur faktin se në vend janë 36 mijë vende të lira pune, ka lëshuar një paralajmërim të fortë për sipërmarrjen, për 800 kompanitë e mëdha në vend. Sipas tij, puna me dy bordero dhe deklarimi i pagave qesharake për pozicione të ndryshme pune nuk do të tolerohet më.
“Dje më vizitoi një sipërmarrës që ka bërë investim të konsiderueshëm për përpunimin e metaleve dhe më tha se ka planifikuar 800 vende pune dhe deri më sot ka mundur të punësojë vetëm 170 persona me një rrogë 450 mijë lekë. Pyetjes sime se për çfarë arsye nuk po plotëson dot numrin e vendeve të punës, iu përgjigj ashtu si të gjithë mund ta marrin me mend. Duan punë, por nuk duan të punojnë, e duan në shtet, nuk e konsiderojnë në privat, e duan me orë të tëra të lira për tu marrë me punën tjetër që janë llafet edhe muhabetet pa bukë, kjo është e vërteta, sikundër ka dhe një tjetër që e shohim si sfidë, puna e mirë paguar, e mirë shpërblyer në çdo aspekt. Këtu ne kemi një mal për të ngjitur se kur mendon se 800 kompanitë më të mëdha deklarojnë se 42% e punonjësve të tyre janë nën 300 mijë lekë dhe shkruajnë në lirat e llogarive, inxhinierëve 250 mijë lekë, ekonomisë 220 mijë është farsë e pabesueshme dhe e pagëlltitshme që nuk do ta pranojmë më, e përsëris thirrjen që të respektojnë punën e tyre se nuk mundet ti shmangen detyrimeve ndaj shtetit duke iu cenuar pensionin dhe të drejtën për të marrë shërbim shëndetësor përmes punës”- tha Rama.
