Pas kthimit nga SHBA ditën e hënë, kryeministri Rama do të vizitojë Kosovën. Ai dhe një pjesë e kabinetit qeveritar, do të udhëtojnë të hënën drejt Prishtinës. Vizita në fjalë dëshmon se mes palëve janë ‘shkrirë akujt’. Me gjasë, për të mbërritur në këtë takim, kanë ndikuar edhe faktorë të tjerë. Kjo erdhi menjëherë pasi kancelarja Angela Merkel pati një takim me liderët e Ballkanit në Tiranë, në kuadër të vizitës së lamtumirës. Faktori ndërkombëtar dhe ai i brendshëm mund të kenë luajtur rol, që Rama dhe Kurti të bëjnë një hap prapa dhe të tentojnë të gjejnë një zgjidhje për nismën Open Balkan.
Me marrjen e mandatit të tretë nga Rama, gjërat duke se kanë nisur të ndryshojnë. Një letër urimi për formimin e qeverisë së re Rama 3, e dërguar nga kryeministri i Kosovës, ka sjellë edhe ‘paqen’ mes Kurtit dhe Ramës. Raportet e tyre kanë qenë të ftohta që përpara zgjedhjeve parlamentare të 25 prillit, e më pas patën kulmin e tyre kur Vetëvendosja kandidoi me disa kandidatë të saj të pavarur në Shqipëri për deputetë, duke qenë opozitare e Partisë Socialiste.
Albin Kurti uron Edi Ramën për mandatin e tretë si kryeministër
Kryeministri i Kosovës, Albin Kurti, ka uruar homologun e tij shqiptar Edi Rama për zgjedhjen për herë të tretë si kryeministër. Përmes një letre, Kurti ka shprehur gatishmërinë e plotë për bashkëpunim të ndërsjelltë. Kurti ka theksuar se ky mandat i tretë është po ashtu mundësi e tretë për të realizuar projekte të cilat priten nga shqiptarët në të dy anët e kufirit.
Ai ka shprehur gatishmërinë e tij të plotë dhe të Qeverisë së Republikës së Kosovës për rritjen e bashkëpunimit ekonomik, shkëmbimit tregtar dhe integrimin e tregut, duke hequr barrierat mes shqiptarëve.
“Ky mandat i tretë është po ashtu mundësi e tretë për të realizuar projekte të cilat kaherë priten nga shqiptarët në të dy anët e kufirit. Rritja e bashkëpunimit ekonomik dhe e shkëmbimit tregtar dhe integrimi i tregut duke hequr barrierat mes shqiptarëve në radhë të parë paraqesin mundësi të shkëlqyer, për realizimin e të cilave qeveria ime dhe unë mbetemi në gatishmëri të plotë”, thuhet në letër.
Kurti përmes letrës së urimit, ka ftuar Ramën për vizitë në Kosovë. “Duke ju uruar suksese gjatë mandatit tuaj qeverisës dhe me kënaqësinë që shkëlqesia juaj të vizitojë Kosovën në një kohë të përshtatshme për Ju, e të fillojmë përgatitjet për mbledhjen e përbashkët të të dy qeverive, pranoni përshëndetjet më të sinqerta dhe konsideratën më të lartë”, vijon më tej letra.
Rama i është përgjigjur me anë të një postimi në Twitter homologut të tij kosovar, Albin Kurti në ftesën për ta vizituar Kosovën.
“Faleminderit Albin Kurti! Patjetër do ta vizitoj me shumë kënaqësi Kosovën, me t’u kthyer nga Asambleja e OKB! Le t’ia nisim menjëherë me përgatitjen e Mbledhjes së Përbashkët. Uroj me gjithë zemër dhe kam besim se do të bëjmë plot punë të mira në dobi të të dy shteteve tona”, shkruan Rama. /Tirana Today
