Shqipëria të premten në mbrëmje do të përballet me Turqinë në stadiumin “Loro Boriçi” në Shkodër. Trajneri italian i kuqezinjve, Christian Panucci ka dalë në konferencën për shtyp para ndeshjes dhe është shprehur se është një atmosferë e mirë dhe se të gjithë janë gati. Viti që lamë pas nuk ishte ndër më të mirët për Shqipërinë, pasi arritën të shënonin vetëm 3 gola, por Panucci beson se me rikthimin e Sadikut sulmi nuk do të jetë problem.
Çfarë keni parë nga skuadra këto ditë?
Kanë punuar mirë. Është ambient i mirë. Djemtë janë gati për ta luajtur këtë ndeshje. Të shikojmë nesër…
Në 2018 Shqipëria shënoi vetëm 3 gola, si keni menduar ta përmirësoni këtë?
Ka ardhur Sadiku, edhe pse nuk është mirë, kemi lojtarë që kanë bërë gola. Mjafton edhe 1 gol për të fituar ndeshjen. Kemi Sadikun, Balaj ka gjetur golin, kemi Grezdën dhe Abazajn gjithashtu.
Duke qenë ndeshja e parë, është e rëndësishme ndaj një kundërshtari të fortë. Çfarë mesazhi u keni dhënë? Ku keni menduar ta godisni? Pika e tyre e fortë?
Është e vërtetë që kanë një skuadër të fortë, por nëse lojtarët kundërshtarë janë të përqendruar për 90 minuta, do të marrim një rezultat pozitiv. E dimë që është e vështirë, por shpresojmë.
Keni deklaruar më parë që do tentoni ta fitoni ndeshjen. Kush janë pritshmëritë konkrete? Me çfarë rezultati do ishit i kënaqur?
Unë jam pozitiv, dhe skuadra është e përgatitur. Ka kualitet, siç ka edhe Turqia. Jam i bindur që mund të arrijmë një fitore, por gjithçka mbetet për t’u parë nesër. Duhet të japim maksimumin në fushë.
