Ditën e sotme është shënuar një rekord i zi nga koronavirusi në Kosovë.
Autoritetet përkatëse bëjnë me dije se gjatë 24 orëve të fundit kanë ndërruar jetë 6 persona si pasojë e COVID-19.
“Qendra Klinike Universitare e Kosovës, përkatësisht klinikat e saj ku po trajtohen pacientët e prekur nga Covid-19 kanë njoftuar se gjatë ditës së sotme, 4 korrik 2020, deri në ora 17:00 kanë përfunduar me vdekje 6 pacientë të infektuar me COVID-19:
Në Klinikën Infektive 1 pacient, në Klinikën e Pulmologjisë 2 pacientë dhe në Mjekësinë Sportive 3 pacientë. Pacientët që kanë përfunduar me vdekje janë: Sh.I. (1949) -Prishtinë; F.H (1948) -Viti, R.K (1950)-Mitrovicë, B. G (1960)-Vushtrri, S. T. (1949) – Fushë Kosovë dhe V. SH. (1982)- Pejë.
Sipas informacioneve nga klinikat, pacientët që kanë ndërruar jetë sot, përveç infeksionit Covid-19, kishin edhe sëmundje të tjera shoqëruese”, thuhet në njoftimin e MSH-së.
Deri më tani në Kosovë janë prekur me koronavirus 3 mijë e 178 persona.
Rikujtojmë se edhe në Shqipëri situata paraqitet shqetësuese, pasi ka pasur një rritje të ndjeshme të numrit të të infektuarve dhe viktimave.
