E kthyer tashmë në një traditë, “Nata e Bardhë” nuk do të vijë në shesh sikundër jemi mësuar, por do të jetë onlone për shkak të situatës me COVID 19. Ndryshe nga vitet e shkuara ku premtohej një natë e zjarrtë, një festë e vërtetë, pandemia ka ndryshuar tërë rrjedhën e këtyre festimeve.
Programi i festimeve të kësaj dite përmbante aktivitete të shumta kulturore-artistike. Tashmë nuk do të kemi publik të prekshëm, por rrjetet sociale të japin mundësinë për ta përjetuar.
Koncertin mund ta ndiqni nga shtëpia të dielën në mbrëmje, nga ora 18:00-20:00. Publiku do të mund t’i ndjekë artistët live përmes rrjeteve sociale. Artistët që do të marrin pjesë në këtë koncert janë Dafina Zeqiri, Soni Malaj, Mr.Elvis, Kastro Zizo, West Side Family dhe Stine.
“Kjo është diçka shumë e rrallë që nuk është bërë ndonjëherë. Janë 15 bateristë që më 28 nëntor, do të interpretojmë vijën melodike të Himnit të Flamurit me groove. 15 tinguj baterie që bëhen bashkë. Sigurisht do të respektojnë distancat dhe masat e AntiCovid. Ishte parashikuar të bëhej me 45 bateristë, por për shkak të situatës e reduktuam me 15 numrin e tyre”, thanë në “Wake Up” organizatorët Ergys Myftari, baterist dhe Marjo Deda, drejtues i orkestrës.
