Kryetarja e Komitetit të Ekspertëve për koronavirusin në vendin tonë, Mira Rakacolli deklaroi mbrëmjen e sotme gjatë një interviste televizive se janë hasur raste të rënda mes 30-35-vjeçarëve.
“Po të vini re, të moshuarit vijojnë të ruhen. Nuk kemi të sëmurë në shtëpitë e kujdesit për të moshuarit. Kjo vjen nga mbrojtja.
Të rinjtë bëjnë jetën më aktive, plazhe, kafene, përqafohen më shumë, rrinë afër më shumë. Kemi pasur raste të rënda mes 30-35-vjeçarëve”, u shpreh ajo.
Ndër të tjera, Rakacolli pohoi se me mbylljen në shtëpi, mundësohet mbrojtja nga sëmundja, mirëpo njerëzit mund të kenë dëmtim të shëndetit mendor:
“Me mbylljen në shtëpi mbrohesh nga sëmundja, por ka edhe një dëmtim të shëndetit mendor. Kjo shoqërohet me një ulje të imunitetit.
Prandaj është një gjë që ndodhi. 1 herë në 100 vjet i ndodh njerëzimit. Jeta nuk do të jetë njëlloj këtë vit. U kuptua tashmë që do bëjë ciklin e vet. Është gjë që na ndodhi”.
