Pas paralajmërimeve të herëpashershme të autoriteteve në Itali, tashmë është marrë vendimi që të rikthehet sërish izolimi. Kryeministri italian, Giuseppe Conte, ka deklaruar se ky “nuk ishte një vendim i lehtë”.
Aktualisht, Italia ka numrin më të lartë të vdekjeve në Evropë nga koronavirusi. Izolimi mbarëkombëtar në Itali do të jetë nga 24 deri më 27 dhjetor, nga 31 dhjetori në 3 janar si dhe nga 5 deri më 6 janar, 2021.
Conte tha se gjatë kësaj periudhe, italianët mund të pranojnë në shtëpitë e tyre deri në dy mysafirë, por këtu nuk përfshihen edhe personat nën moshën 14-vjeçare. Ndërkaq, ora e ndalimit të qarkullimit do të vazhdojë të jetë nga ora 22:00 deri në orën 05:00.
Nga 28 deri më 30 dhjetor si dhe më 4 janar, do të aplikohen masa më lehtësuese. Në këto ditë, qytetarët do të lejohen të dalin nga shtëpitë e tyre, por baret dhe restorantet do të jenë të mbyllura.
Gjatë festave të fundvitit, në Itali do të mbyllen dyqanet jo të domosdoshme dhe baret, ndërkaq italianët do të lejohen të shkojnë në punë dhe të dalin nga shtëpitë vetëm për emergjenca shëndetësore.
