Pavarësisht thirrjeve të vazhdueshme nga ana e Postës Shqiptare, shqiptarët nuk binden! Kjo foto e ardhur në redaksinë e “Tirana Today” dëshmon sesi qytetarët presin jashtë ambienteve, ndonëse distanca duhet të jetë më e madhe, ashtu sikundër e ka shprehur vazhdimisht ditët e fundit kryeministri Rama.
Madje jo më larg se dje, Posta Shqiptare ka bërë një njoftim të rëndësishëm për të gjithë të moshuarit që presin të tërheqin pensionin e tyre. Në një postim në Facebook, Posta i ka kërkuar të gjithë të moshuarve që të mos paraqiten fizikisht për të marrë pensionin e tyre, por të dorëzojnë të dhënat.
Në bazë të një hulumtimi që ka bërë “Tirana Today”, vihet re se këto filiale postare vijojnë të japin shërbimin, që në jo pak raste ka krijuar radhë të gjata. Po kështu, edhe rrisku për koronavirusin është më i madh. Në rastin konkret, ku qytetarët nuk kanë respektuar distancën e sigurisë.
Bilanci i COVID-19 në Shqipëri ka shkuar në 59 të prekur, mes tyre dy viktima. Viktima e parë me COVID-19 u shënua në spitalin e Durrësit, ku humbi jetën një 73-vjeçare. Po kështu, 9 prej të infektuarëve janë mjekë dhe infermierë, një nga Spitali i Durrësit dhe të tjerët nga spitali “Shefqet Ndroqi”.
