Ish-deputeti Edi Paloka kërkon ndërhyrjen e ndërkombëtarëve për zgjidhjen e krizës. Por, sipas ish-deputeti, hapi i parë që duhet të ndërmerret është largimi i Ramës.
Sipas tij, me emërimin e Damian Gjiknurit si përgjegjës për çështjet zgjedhore Rama po tregon vendosmërinë për të blerë sërish votat, por Paloka thotë se gabimi i 2017 nuk do të përsëritet më.
“Nuk ka zgjedhje në Shqipëri pa u larguar Rama dhe pa u krijuar kushtet për zgjedhje të lira e të ndershme. Vendim politik për të hyrë ose jo në zgjedhje nuk ka akoma, por po them që me këtë kryeministër që vazhdon të tregojë me këmbëngulje dhe arrogancë që do vazhdojë t’i vjedhë votat ma thoni ju rrugën. Zgjedhje pa kushte nuk do të ketë”, u shpreh nënkryetari i PD-së Edi Paloka për News 24.
Por si mund të zgjidhet kriza kur palët nuk ulen në tryezë?
Paloka thotë se Partia Demokratike pranon ndërhyrjen e ndërkombëtarëve por pasi Edi Rama të jetë larguar nga posti i kryeministrit.
Largimi i Ramës shprehet Paloka, hap rrugën e dialogut.
“Një qeveri që në radhë të parë do të thotë Rama jashtë qeverisë. Që nga ai moment fillojnë negociatat, dialogu dhe çfarëdo lloj gjëje tjetër që lidhet me zgjedhjet e ardhshme. Rama nuk konsiderohet më si pjesë e negociatave. Për ne më mirë të ndërhyjnë ndërkombëtarët”,- vijoi ai.
Nënkryetari i Partisë Demokratike thotë se protestat do të vijojnë jo vetëm ato që do jenë të lajmëruara, por paralajmëron dhe surpriza për kryeministrin Edi Rama.
