Kreu i shtetit shqiptar, Ilir Meta, ka përshëndetur marrëveshjen për qeverinë e re në Maqedoni, duke vlerësuar rritjen e përfaqësimit të faktorit shqiptar.
Në mesazhin e radhës ndarë me ndjekësit në Facebook, presidenti Meta i kërkon politikës në Tiranë që të marrë shembull nga Maqedonia, dhe të rikthehet sa më shpejt në shina.
Kjo gjë duhet të bëhet, sipas tij, duke nisur nga marrëveshja e 5 Qershorit dhe plotësimin e gjithë kushteve të tjera. Meta citon më tej se finalizimi i marrëveshjes për formimin e Qeverisë së re në Maqedoninë e Veriut, është një tjetër hap pozitiv për forcimin e institucioneve demokratike dhe përparimin e reformave.
Statusi
Finalizimi i marrëveshjes për formimin e Qeverisë së re në Maqedoninë e Veriut është një tjetër hap pozitiv për forcimin e institucioneve demokratike dhe përparimin e reformave.
Rritja e përfaqësimit të faktorit shqiptar në qeverisje, përfshirë dhe mundësinë e Kryeministrit shqiptar në të ardhmen, është tregues europianizues dhe vitalizues për forcimin e bashkëjetesës.
Pas zgjedhjeve demokratike dhe konkurruese, fqinji ynë ecën me siguri të merituar për çeljen e negociatave me Bashkimin Europian.
Duhet të mësojmë prej tyre dhe të kthehemi në shina sa më parë, duke nisur me respektimin e Marrëveshjes së 5 qershorit dhe plotësimin e gjithë kushteve të tjera.
