Një 73-vjeçar nga Florida ka bërë të lumtur 36 familje të cilat ishin në rrezik t’u ndërpritej energjia elektrike gjatë sezonit të festave të fundvitit.
I moshuari i cili është pronar i një kompanie që instalon pishina, i ka paguar faturat e energjisë elektrike 36 familjeve fqinje me të.
Ideja thotë se i erdhi kur kujtoi veten e tij disa vite më parë, kur kaloi një dimër dhe festa “të ftohta” pasi nuk kishte pasur mundësi financiare.
“Kjo më ndodhi mua në vitet 80,” i tha ai BBC News, duke treguar se atë kohë kishte pasur probleme financiare dhe madje nuk kishte bërë dot asnjë dhuratë për Krishtlindje.
“E mbyllën gazin gjatë gjithë dimrit,” tha ai, duke shtuar se qëlloi që të ishte një nga dimrat më të ftohtë të regjistruar ndonjëherë në Pensacola.
Në total, i moshuari pagoi 4,600 dollarë për të ndihmuar 36 familje në komunitetin e tij prej 6.000 banorësh.
