“Na lidhën gojën dhe na mbyllën në dhomë”, e moshuara tregon detaje nga grabitja

Janë zbardhur detaje të tjera nga grabitja e ndodhur sot në orët ne para të mëngjesit në Gjirokastër. Kujtojmë që disa persona të maskuar hynë në banesën e dy të moshuarave dhe me kërcënim u morën një sasi të madhe parash.

Sipas informacioneve të reja, banesa është në pronësi të shtetasit Vasil Basho, i cili jeton në Greqi dhe që është nisur për në Shqipëri.

Në momentin e grabitjes, në banesë ndodheshin vetëm vjehrra e Vasilit me një plakë tjetër, që e shoqëronte gjithmonë, dhe që të dyja ishin mbi 80 vjeçe. Pronari i shtëpisë pretendon që autorët i kanë marrë 15 mijë euro. Ngjarja ka ndodhur në fshatin Terihat, Bashkia Dropull.

Sipas Faxweb, grabitësit i kanë rrahur të moshuarat, iu kanë lidhur gojën dhe më pas i kanë mbyllur në dhomë. Sipas të moshuarave, ku autorët kanë shkatërruar banesën duke kontrolluar për sende me vlerë.

E zonja e shtëpisë që ka ardhur sot nga Athina tregon se grabitësit flisnin në greqisht, edhe pse ky mund të jetë një rreng i tyre për të mos u identifikuar.