Pas skandalit të pagave, të gjithë punonjësit e IT në Drejtorinë e Tatimeve janë pezulluar nga detyra. Me anë të një shkrese zyrtare, bëhet me dije se janë pezulluar nga detyra punonjës në disa sektorë të Drejtorisë së Tatimeve, derisa të sqarohet e vërteta e rrjedhjes së pagave.
“Urdhërohet pezullimi i të gjithë punonjësve në Sektorët e Drejtorisë TIK të Tatimeve, si më poshtë: Sektori i pajisjeve fiskale; Sektori i Operacioneve; Sektori i Zhvillimeve të Mirëmbajtjes së Programeve; Sektori i Rrjetit dhe Infrastrukturës; Sektori i Ndihmës Teknike; Sektori i Sigurisë së Të Dhënave; Sektori i Tatimpaguesve të Mëdhenj. Ky vendim hyn menjëherë në fuqi”, thuhet në dokument.
Prej ditësh ka lindur një debat i gjerë, pasi disa databaza me të dhëna personale të qindra mijëra qytetarëve shqiptarë, si paga, numra të kartave të identitetit apo targa të automjeteve, po qarkullojnë në rrjetin social “WhatsApp” dhe ndërkohë janë bërë publike në media.
Kujtojmë që lista e pagave, një dokument në formatin “Excel” ka qarkulluar në “WhatsApp”, duke përbërë një shkelje flagrante të të dhënave personale të qytetarëve shqiptarë, ndërkohë që në vijim të marrjes së masave dje janë pezulluar nga detyra të gjithë punonjësit e IT në Drejtorinë e Tatimeve, masë kjo që do të jetë e vlefshme deri në përfundim të hetimeve nga organet ligjzbatuese. Më herët për këtë ngjarje është dorëhequr drejtori i Teknologjisë së Informacionit në Drejtorinë e Përgjithshme të Tatimeve. Pezullimi i punonjësve të IT në Drejtorinë e Tatimeve, ka ardhur për shkak të rrjedhjes së listës së të dhënave personale dhe pagave të mijëra punonjësve shqiptarë.
