Dy persona janë vënë në pranga, të dyshuar si përkrahës të autorëve të vrasjes së Albi Bashaliut. Si rezultat i veprimeve hetimore u bë i mundur arrestimi i shtetasve me inicialet V. B., 41 vjeç dhe M. Xh., 30 vjeç, të dy banues në fshatin Gjoçaj, Peqin. Nga tërësia e veprimeve hetimore të kryera është dokumentuar se këta shtetas, kanë kryer veprime aktive, për të fshehur rrethanat e ngjarjes dhe kanë penguar aktivisht organet e policisë për t’u informuar për ngjarjen, rrethanat si ka ndodhur dhe motivin.
“Gjithashtu, në kuadër të kryerjes së veprimeve procedurale dhe thellimit të hetimeve për këtë ngjarje të rëndë kriminale, në ndjekje e sipër të autorëve të dyshuar të veprës penale, më datë 28.12.2021, rreth orës 01:00, në aksin rrugor Gosë-Vibashtovë, Rrogozhinë, është gjetur automjeti tip “Volkswagen Caddy”, që ka qenë në përdorim nga viktima, shtetasi A. B.
Nga rrethanat e hetimit dyshohet se autorët kanë marrë mjetin e viktimës për t’u larguar, ndërsa mjetin me të cilin ata udhëtonin e kanë djegur në vendngjarje.
Në vendngjarje janë gjetur sende të ndryshme, të cilat u sekuestruan në cilësinë e provave materiale dhe që u dërguan për ekzaminime të mëtejshme në Institutin e Policisë Shkencore.
Nga strukturat hetimore të Drejtorisë Vendore Elbasan, nën drejtimin e Prokurorisë së Rrethit Gjyqësor Elbasan, po punohet për identifikimin dhe kapjen e autorëve”.
Bashaliu u ekzekutua në fshatin Gjocaj në Peqin. 32-vjeçari ishte person me precedent penal, ndërkohë që vëllai i tij ishte arrestuar për një vrasje të ndodhur në muajin qershor të vitit 2021.
Pista kryesore e hetimit mbetet ajo e hakmarrjes. Kjo pasi vëllai i viktimës Leonard Bashaliu vrau me armë zjarri në muajin qershor Ylber Xhahysën. Deri më tani policia ka shoqëruar 20 persona, mes të cilëve është edhe djali i Xhahysës, Enriko Xhahysa 22-vjeç.
Burime policore bëjnë me dije se momentin e ekzekutimit të Albi Bashaliut, 22-vjeçari ka qenë në një lokal 150 metra larg vendit të ngjarjes. Albi Bashaliu nuk ruhej dhe bënte një jetë normale.
Sipas dëshmive në vendngjarje, autorët e kanë pritur 32-vjeçarin sapo ka dalë nga makina dhe e kanë qëlluar.